次次去冰島都剩係睇藍冰洞、黃金圈呢啲熱門景點﹐有無唸過其實必經既首都—雷克雅未克都有好多值得到訪既景點呢！而家就等Icelandeasy帶你一次過睇哂市內觀光既完整路線啦！
冰島經常比坊間譽為係「上天賜既禮物」﹐佢既天然景色係無容置疑﹐但其實除左靚景外﹐冰島都係一個充滿文化氣息既地方﹐而雷克雅未克就絕對係一個兩者兼備既好地方！雖然雷克雅未克好細﹐但就五臟俱全！所有着名景點都只係行路既距離﹐所以預留大約半日到一日既時間就夠哂啦﹐等我同大家介紹下有咩好食好玩啦！
#1 珍珠樓（Perlan）
第一站我會建議大家先去離市區最遠既珍珠樓（Perlan）﹐話遠唔遠﹐係市中心行過去大約三十分鐘到﹐當然都有公共交通工具可以直達﹐不過沿路景色都唔錯﹐一路行一路感受下冰島既新鮮空氣﹐一早食完早餐就起行﹐Fit呀！
就咁入去參觀係免費既﹐不過如果要上觀景台同睇冰河展覽就要收費啦：分別前者收費係每位490ISK；後者則每位2900ISK﹐小編就覺得兩者都值得比錢參觀啦！
觀景台係位於頂樓戶外﹐可以直接搭電梯上﹐出到觀景台後可以圍繞行一圈﹐由於地理位置優勢﹐位於小山丘之上既珍珠樓可以一覽無遺雷克雅未克既景色﹐天氣好既話仲可以直接睇到遠處既雪山！其他地標例如哈爾格林姆教堂、Harpa音樂廳等等都盡收眼底﹐完全值回票價呀！由於珍珠樓既穹頂係全玻璃﹐所以係入面一抬頭就會望到藍天白雲﹐自然光直接射入館內﹐唸起都超治癒！
入返館內﹐就可以輕移玉步去睇冰河展覽：佢擁有一座全世界最大既人造冰洞﹐實際模擬真實冰洞入面會出現既各種形狀同樣貌﹐仲保持住真實冰洞既溫度！雖然門票唔算平﹐面積都唔算大﹐不過如果你時間緊迫而未能安排冰洞係行程內﹐又或者係夏天去同冰洞無緣﹐就一定要黎呢個人造冰洞體驗下啦！展覽全程會由專業英語導遊解說﹐介紹冰洞各種形成既原因、構造同近年面對既困難等等；離開冰洞過後會有同冰川有關既展板同互動裝置﹐可以藉此認識幾個係冰島地位舉足輕重既冰川地貌﹐幾好玩咖！
玩左兩三個鐘﹐係時候坐低嘆杯咖啡休息下。係頂層既紀念品店旁邊﹐有一間超靚既UT 1 BLAINN Café﹐由底到頂全落地玻璃﹐唸起自己拎住杯咖啡﹐眺望雷克雅未克全景﹐個種居高臨下、超寫意既感覺﹐應該畢生難忘……係呢到渡過一日半日完全不成問題。
Perlan 珍珠樓
地址：Öskjuhlíð, 105 Reykjavík
開放時間：09:00~19:00（18:00截止入場）
電話：+354 562 0200
門票：觀景台每位490ISK；冰河展覽每位2900ISK
展覽官方購票網站：http://perlan.is/wonders-of-iceland/
交通：徙步/ 到Hlemmur巴士總站搭18號巴士/ 來往Harpa音樂廳免費接駁車
#2 Harpa音樂廳
參觀完珍珠樓﹐下一站我地就出發去Harpa音樂廳﹐鐘意散步既朋友可以慢慢行過去﹐不過就係大約三十至四十分鐘時間﹐想慳啲時間既可以乘搭來回Harpa音樂廳同Perlan珍珠樓既免費接駁車﹐會直接係門口落﹐由朝早十點到晚上七點半每三十分鐘一班﹐最後係珍珠樓回程既班次為晚上七點四十五分。（詳情請參閱：https://perlan.is/free-shuttle-bus/）
Harpa音樂廳背山面海﹐坐落於市中心舊港旁邊﹐外牆都係採取全玻璃製作﹐睇黎冰島人都幾重視自然光！係陽光折射下既柱狀玻璃﹐有無覺得好似啲咩？就係其中一樣冰島既自然景觀—玄武岩啦！聽講設計師既設計靈感都係源自於此﹐過千塊不規則既玻璃﹐係柔和既陽光底下幻化出無窮無盡既變化﹐呢啲光影折射既景象展現出冰島既冰川同北極光﹐令音樂廳既藝術指數UP！鐘意影相既朋友千奇唔好錯過﹐入面真係點影都成個萬花茼咁靚呀！呢到除左係音樂廳之外﹐同時都係會議中心﹐完全將文化融入於生活當中。
小編強烈建議各位朋友係入夜後再黎一趟Harpa音樂廳﹐夜晚無左太陽照射﹐就由五光十色既射燈代替﹐同朝早柔和既感覺成強烈對比﹐呈現出一副高貴既外貌﹐總之就一定唔會令你失望啦！如果無時間購票入場睇音樂會﹐都可以參加佢地既導覽﹐提供英語講解﹐大約四十五分鐘﹐可以於一樓售票處購買﹐不過其實入面大部分空間都係免費開放參觀。佢開幕既時候被《紐約時報》評選為「2011年全球最值得旅遊的41個地方」之一﹐咁你知道點解Harpa咁值得去啦！
Harpa音樂廳
地址：Austurbakki 2, 101 Reykjavík, Iceland
電話: +354 528 5000
開放時間：
建築：每天08:00-24:00
售票處：週一到週五09:00-18:00/ 週末 10:00-18:00
官網：http://en.harpa.is/
#3 太陽航海者 The Sun Voyager
參觀完宏偉既音樂廳之後﹐沿住舊港海旁行大約五分鐘﹐距離600公尺外﹐就會到達我地下一個目的地—太陽航海者 The Sun Voyager。又俗稱維京船骨架﹐由一位冰島雕塑家Jón Gunnar Árnason創作﹐係冰島既地標之一。呢艘金屬船形骨架都有段歷史咖：傳說第一批登陸冰島既祖先維京人就係呢個港口上岸﹐係紀念雷克雅未克呢座城市成立二百週年而建設既雕塑﹐象徵住維京人既精神﹐由鋼鐵同金屬造成既骨架就象徵住維京人方剛既氣魄。唔好睇佢就咁一個雕塑好似無乜睇頭﹐其實配合埋個海同另一邊既山脈，加上唔同既天氣景色﹐的確係唔少專業攝影師既好Model！
太陽航海者 The Sun Voyager
地址：Sculpture & Shore Walk, 101 Reykjavík
#4 托寧湖 Tjörnin Lake
之後我地沿住舊港海旁慢慢散步﹐向返市中心方向走﹐往距離步行大約二十分鐘左右既托寧湖（Tjörnin）進發。湖面平靜如鏡﹐同充斥住大量遊客既雷克雅未克市中心做成好大對比﹐湖上一年四季都有好多唔同既動物﹐例如天鵝、野鴨、海鷗等等﹐大家好彩既話仲有機會睇到百鴨同遊！好多遊客都會帶同飼料或麵包黎餵飼﹐由於湖面長期都有好多鳥類係到休息﹐所以當地人都會稱佢為天鵝湖、鴨子湖﹐不過佢咩名都唔重要﹐最緊要你地記得黎呢到散下步同朋友仔傾下密計﹐唔趕既話仲可以帶啲零食黎野餐﹐相當寫意！湖邊仲環繞住各大建築物﹐有冰島國家美術館、國立博物館、冰島議會、雷克雅未克市政廳、大學、公園等等﹐另外仲對正地標哈爾格林姆教堂﹐景觀直情係爆哂分！小編剩係唸都已經成個人放鬆哂…托寧湖絕對係CHILL既好地方！冬天既佢會結一層厚厚既冰﹐可以完全橫穿湖面﹐有時你仲會見到冰島人係冰上踢波嬉戲﹐好趣緻！
托寧湖 Tjörnin Lake
地址：Tjörnin, 101 Reykjavik
托寧湖附近有雷克雅未克市政廳（Reykjavik City Hall）、冰島國立博物館、冰島國立美術館﹐各有特色﹐得閒記住都去睇下啦！
雷克雅未克市政廳 Reykjavik City Hall
地址：Tjarnargata 11, 101 Reykjavík
開放時間：08:00-19:00（週六、日公休）
電話：+354 411 1111
冰島國立美術館
地址： Fríkirjiuvegur 7,, Fríkirkjuvegur, 101 Reykjavík
開放時間： 10:00~17:00
電話： +354 515 9600
冰島國立博物館 National Museum of Iceland
地址： Suðurgata 41, 101 Reykjavík
開放時間： 10:00-17:00（週一公休）
電話： +354 530 2200
#5 哈爾格林姆教堂 Hallgrímskirkja
最後﹐我地會以座落係心臟地帶既哈爾格林姆教堂（Hallgrímskirkja）完結市中心一日遊既行程﹐距離都係大約二十分鐘步行﹐係一個好典型既北歐式教堂﹐白色潔淨為主﹐內部有一座大型管風琴﹐係冰島最大既教堂。教堂外型設計靈感都係黎自冰島着名自然景觀柱狀玄武岩同管風琴管﹐係一座呈三角形既尖塔建築。
教堂中殿係免費參觀﹐另外仲有一座尖塔﹐有電梯連接方便遊客登頂﹐係至高點上可以一覽雷克雅未克既城市風光﹐天氣好時仲有機會睇到遠方既雪山﹐絕對係一個攝影好地方；不過登頂需要係一樓售票處購票﹐價值1000ISK﹐小編就覺得登頂既話教堂同珍珠樓可以二選一啦！而教會周不時都會係教堂內安排演奏會﹐大家記住去碰下運氣啦！
哈爾格林姆教堂 Hallgrímskirkja
地址：Hallgrímstorg 101, 101 Reykjavík
開放時間：
冬季(5-12月) 09:00-17:00﹐半小時前最後登塔
夏季(6-9月) 09:00-21:00﹐半小時前最後登塔
登頂門票：成人1000kr、7至16歲小童100kr
官網：http://en.hallgrimskirkja.is/information/the-tower/
#6 舊港
最後等我講一下市心中既舊港啦﹐好多出名既景點都係附近﹐例同跳蚤市場（Kolaportið）、冰島最出名既熱狗店（Tryggvagata 1）、最出名既龍蝦湯Sægreifinn、最出名既Cocktail Slippbarinn﹐沿海仲有海事博物館、鯨魚博物館等等﹐應有盡有！而小編最想介紹既就係大家可以係舊港搭船出海睇海豚、鯨魚同海鸚鵡(Puffin)﹐兩者都可以揀搭大船或者快艇﹐小編就私心推介後者啦！因為坐快艇出海好大機會有一大堆海豚跟住你﹐同你一齊出海搵座頭鯨﹐之後會帶大家近距離到岩石邊探一大群海鸚鵡既棲息點﹐好過癮！如果坐大船可能就要遠小小睇啦﹐不過各有好處﹐兩者都係相約三個鐘到﹐大家可以跟住自己既需要黎選擇行程﹐不過呢個都可以話係同藍湖一樣﹐係雷克雅未克必去既行程之一﹐詳情：
乘坐快艇觀賞鯨魚和海鸚鵡：https://bit.ly/2GAaQu4
乘住大船觀賞鯨魚：https://bit.ly/2Fnhn8g
以後去雷克雅未克唔只剩係Shopping啦！等咩呀﹐起行啦！
